Archive for the “Námskeið” Category

Greinarhöfundur, Erla Kristín

Greinarhöfundur, Erla Kristín

Nýliðaþjálfun 2016-2018, skemmtilegur og lærdómsríkur tími

Eftir því sem árin liðu fór ég að sjá eftir því að hafa aldrei gengið til liðs við björgunarsveit. Í gegnum tíðina hafði ég stundað töluverða útivist og elskaði ævintýramennsku. Ég var í nokkuð góðu formi og sá því fram á að geta gefið heilmikið af mér. Ég nefndi þessar hugrenningar mínar eitt sinn við fullgildan björgunarsveitarmann. Hans svar var stutt og laggott: ,,Af hverju drífur þú þig ekki bara í þetta?” Ég var þá 46 ára og taldi mig alltof gamla í hlutverk sem þetta en viðkomandi taldi svo ekki vera. Það var síðan haustið 2016 sem ég sá auglýsingu um kynningu á nýliðastarfi Björgunarsveitar Hafnarfjarðar. Þangað fór ég og eftir það var ekki aftur snúið.

Við tók átján mánaða fjölbreytt og ströng þjálfun sem fólst meðal annars í námskeiði í fyrstu hjálp, kennslu í fjarskiptum, leit í snjóflóðum, fjallamennsku, ferðamennsku, rötun, leitartækni og meðferð slöngubáta svo fátt eitt sé nefnt. Þá hittumst við á æfingum og fundum einu sinni í viku, fórum í tveggja daga sumarferð og tveggja daga vetrarferð þar sem skipulagningin var alfarið á okkar herðum auk þess sem við þurftum að bera allan búnað og kost á bakinu og sofa úti.

Þrettán einstaklingar af þeim þrjátíu sem mættu til kynningarfundarins þreyttu síðan nýliðaprófið 7. apríl 2018 og fóru í gegnum alla þjálfunina. Ég get alveg viðurkennt að ég kveið svolítið fyrir prófinu því mín eina vitneskja var að það stæði yfir frá kl. 18 á föstudegi til sama tíma daginn eftir of farið yrði skriflega yfir það námsefni sem við höfðum lært. Prófdagurinn rann síðan upp bjartur og fagur og prófskrekkurinn fjaraði út að mestu. Við, nýliðarnir, mættum niður í Klett, fullir eftirvæntingar að takast á við það sem að höndum bæri.

Nýliðunum var skipt upp í þrjá hópa. Minn hópur byrjaði á því að fara í sjóverkefni sem fólst í því að fara á slöngubát til leitar að ölvuðum manni sem sést hafði til á samskonar bát við höfnina. Leitin gekk vel, maðurinn fannst og var komið upp í okkar bát og hans dreginn til hafnar. Eftir það tók við skriflegt próf og síðan rötunarverkefni sem fólst í því að við fengum uppgefinn upphafspunkt og endapunkt ásamt landakorti og áttavita. Við áttum að skipuleggja leiðina sjálf, bæta við nokkrum punktum og taka stefnuna með áttavitanum.

Þegar allt var orðið klárt var okkur hent út í svarta myrkur og kafaldsbyl, kl. 23:30 við Höskuldarvelli. Ferðin gekk hægt sökum þess að töluverður snjór var á svæðinu og einn nýliði meiddist á fæti sem varð til þess að við þurftum að taka á okkur góðan krók svo hægt yrði að sækja hann. Það hafðist allt að lokum og í skátaskálann við Kleifarvatn vorum við komin kl. 07:10 að morgni laugardagsins. Þar biðum við eftir því að hinir hóparnir kæmu í hús, nærðumst og náðum úr okkur mesta hrollinum. Síðasti hópurinn kom síðan í hús um kl. 08 og fékk hann klukkustund til að jafna sig. Eftir það var komið að því að ganga frá, enda kominn nýr endapunktur fyrir hópinn. Okkur var því ekki til setunnar boðið þrátt fyrir að hafa ekkert sofið um nóttina og vera orðin úrvinda af þreytu.

Allur hópurinn arkaði því af stað upp í Vatnshlíð þaðan sem við vorum sótt og ekið í Kaldársel. Þar var okkur aftur skipt upp í þrjá hópa og látin leysa ýmis verkefni. Minn hópur byrjaði á sjúkraverkefni sem fólst í því að hlúa að og búa um sjúkling. Síðan tók við bílaverkefni sem fólst í því að tappa dekk, spila upp bíl og læra á búnaðinn í bílnum. Þá fórum við í sig í sprungu og snjóflóðaýla leit. Lokaverkefnið sneri að leitartækni. Fjórir krakkar úr unglingastarfinu höfðu farið hjólandi upp í Kaldársel og ætlað að ganga á Helgarfell en ekki skilað sér til baka. Hjólin þeirra voru í Kaldárseli og okkar verkefni fólst í því að finna þau. Leitina skipulögðum við sjálf: Stjórnun – áætlun – bjargir – framkvæmd.

Krakkarnir fundust síðan víðsvegar um svæðið í misjöfnu ásigkomulagi. Tveir gátu gengið sjálfir, einn þurfti að bera og annan þurfti að flytja af toppi Helgafells með þyrlu. Ég get alveg viðurkennt það að undir lok dags, þegar einn var enn ófundinn og ég ákvað að fara upp á Helgarfellið til leitar hugsaði ég: Er ég virkilega að fara þarna upp, algerlega ósofin og búin að vera á gangi eða hamast meira eða minna í 22 klukkustundir? Ferðin upp var hins vegar mun auðveldari en ég átti von á og þegar á toppinn var komið, fann ég það með sjálfri mér, að hefði líf verið í húfi, hefði ég getað farið nokkrar ferðir til viðbótar.

Þeir átján mánuðir sem nýliðaþjálfunin stóð yfir voru skemmtilegur og lærdómsríkur tími. Hópurinn var vel samstilltur og innan hans og sveitarinnar hef ég kynnst mörgu góðu fólki. Ég vil meina að skammstöfunin okkar BSH, standi ekki bara fyrir Björgunarsveit Hafnarfjarðar, heldur einnig fyrir Bestu Sveit í Heimi. Það var stoltur hópur sem skrifaði undir samning við BSH þann 12. apríl síðastliðinn. Við vorum stolt af sjálfum okkur yfir að ná tilskyldum skilyrðum og stolt af því að fá að starfa með sveitinni um ókomin ár.

Erla Kristín Birgisdóttir.

 

Greinin var birt í áramótablaði Björgunarsveitar Hafnarfjarðar 2018, bls. 10, en við uppsetningu á blaðinu klipptist því miður neðan af greininni og er hún því hér birt að fullu. Ritstjórn blaðsins harmar mistökin.

Comments Comments Off on Nýliðaþjálfun 2016-2018

FB_IMG_1543608364872Miðvikudaginn 28. nóv síðast liðinn kl.19:30 flutti Bergur Einarsson, undanfari og Jökla-og jarðeðlisfræðingur fyrirlestur um veðurfræði. Fyrirlesturinn var haldinn í húsi okkar Björgunarmiðstöðinni Klett og var skyldunámskeið fyrir nýliða og áhugaverð upprifjun og umhugsunarefni fyrir aðra félaga.

Við þökkum Berg kærlega fyrir góðan og áhugaverðan fyrirlestur.

FB_IMG_1543608358687

Comments Comments Off on Veðurfræði fyrirlestur

44932883_10156982672797160_2468341696698515456_n

Fyrsta hjálp 1 og 2  var kennd um liðna helgi. Björgunarsveitin kom saman á Úlfljótsvatni og fór í gegnum tvö námskeið, Fyrstu hjálp 1 og 2.  Umsjón með helginni hafði Vigdís sem er ein af okkar reyndustu Fyrsta hjálpar manneskjum og leiðbeinandi í fræðunum. Nýir meðlimir fóru í gegnum námskeiðin í fyrsta sinn og góður fjöldi  eldri meðlima kom með og tók endurmenntun, sátu valda fyrirlestra og hjálpuðu til með undirbúning, eldamennsku og verklegar æfingar. Vel var við hæfi vegna tímasetningar að hafa Halloweenþema og skemmtu félagar sér konunglega. Kærar þakkir til allra sem hjálpuðu við undirbúning og við kennslu og umsjón námskeiðsins.

Fleiri myndir má finna á myndasafni sveitarinnar á Facebook.

Comments Comments Off on Fyrsta hjálp um liðna helgi

matarthattur-kjotsupa

Félagar athugið sunnudaginn 4. nóv kl. 14 er ætlunin að hittast og græja slatta af kjötsúpu. Kjötsúpan verður fryst fyrir komandi vetur og hægt að nýta hana í útköllum, ferðum og fleira.

Fátt gefur meiri kraft en alvöru íslensk kjötsúpa.

Nánar um viðburðinn á félagsvef okkar á Facebook.

Comments Comments Off on Kjötsúpudagur vetrarins

Fluglinutaeki

Að kvöldi þriðjudags 16, október var Sjóflokkurinn okkar með námskeið fyrir alla félaga sem hét “Kennsla og notkun Fluglínutækja”. Námskeiðið var haldið fyrir utan höfuðstöðvar okkar, Klett.

Farið var í gegnum uppsetningu á fluglínutækjunum, notkun þeirra og helstu veikleika og styrkleika búnaðarins. Fluglínutæki er eitt af elstu björgunartækjum sem notað er í sjóbjörgun og teljum við afar nauðsynlegt að halda við þekkingu á notkun tækjanna og halda í hefðina að félagar deili reynslu sinni og þekkingu. Nauðsynlegt er að sem flestir kunni á þennann gamalgróna búnað og með námskeiðum sem þessu tryggjum við að þekking og reynsla viðhelst í sveitinni.

Mæting var mjög góð og var frábært að sjá áhuga þátttakenda. Björgunarsveitastarfið snýst fyrst og fremst um samvinnu og var það nákvæmlega það sem við gerðum og æfðum þetta kvöld.

Frábært kvöld með svo frábæru fólki. Sjóflokkur þakkar fyrir kvöldið!

Hér gefur að líta myndir af æfingunni, í opnu myndasafni á Facebook.

 

 

 

Comments Comments Off on Æfing í notkun fluglínutækja

Verið að hjálpa Gumma að græja sig fyrir köfunSeinustu tvær helgar hefur verið nóg um að vera í Njarðvíkurhöfn en kafarar frá SL hafa verið þar á leitarköfunarnámskeiði.
Nokkur ár eru síðan að seinast var haldið námskeið í leitarköfun og því kærkomið að fjölga aðeins í hópunum og fá inn nýja meðlimi.

Að þessu sinni tóku tveir kafarar frá BSH, þau Guðmundur Sveinbjörn og Elíza Lífdís, þátt, sem og þrír kafarar frá BSS. Í heildina vorum við þó mest 11 með leiðbeinendum, línumönnum og bátafólki og því ljóst að kafarar þurfa að vera í góðu samstarfi við sjóflokk.

Námskeiðið gengur eins og nafnið gefur til kynna að miklu leiti út á það að kafa og leita en þó eru margir þættir sem að þarf að hafa á hreinu áður en stokkið er út í.
Í leitarköfun er kafarinn tengdur við yfirborðið með línu þar sem að svokallaður línumaður (e. tender) heldur í hinn endann og hefur samskipti við kafarann með línumerkjum. Æfðum við þau í þurræfingum á landi áður en haldið var niður á bryggju.

Línumaður sér um að fylgjast með því hvað kafarinn er að gera, að hann sé að leita það svæði sem að honum er ætlað að leita, gefa honum leiðbeiningar hvert hann á að fara og gæta öryggis kafarans. Allir kafara æfa sig í að vera línumenn og þjálfast þannig í því að vera á báðum endum.

Kafararnir þurfa einnig að æfa sig í því að leita í litlu sem engu skyggni og að starfa sem línumenn við misgóðar aðstæður.
Sú var einmitt raunin seinustu helgi þegar við fengum allt frá glampandi sól og logni (já þið lásuð rétt, það var logn á Reykjanesinu) yfir í slyddu og lemjandi norðaustanátt. En það er nú bara veruleikinn sem að við búum við og því ágætt að þjálfast í því hvernig við tökumst á við mismunandi veðráttu enda að ýmsu að hyggja þegar þú ert með blautan kafara sem að þarf að bíða uppi á bryggju á milli kafanna.

Seinasta daginn á námskeiðinu höfðu Suðurnesjamenn komið bíl fyrir í höfninni og fengum við að kafa í hann og æfa okkur á þeim aðstæðum.

Náið samstarf er á milli köfunarhóps og sjóflokks BSH enda samofið starf við leit á sjó. Allir meðlimir köfunarhóps BSH starfa einnig sem sjóflokksmeðlimir og er hópurinn því þéttur. Köfunarhópur BSH samanstendur nú af sjö köfurum með mis mikla reynslu, allt frá rúmu ári upp í áratugi og er það von okkar að hópurinn haldi áfram að dafna.

Þökkum við Suðurnesjasveitinni kærlega fyrir samvinnuna á námskeiðinu sem og leiðbeinendum fyrir vel heppnaðar helgar á hafsbotni.

Comments Comments Off on Nýir leitarkafarar